Selfoss vann nokkuð öruggan sigur á ÍR á Ragnarsmóti karla í handbolta í Set-höllinni í kvöld, 40-35.
Selfyssingar náðu fljótlega frumkvæðinu og voru komnir með fimm marka forskot eftir korter, 10-5. Munurinn varð mestur sjö mörk en þá tóku ÍR-ingar við sér og minnkuðu muninn í 20-17 og þannig stóðu leikar í hálfleik.
Selfoss hafði öruggt forskot allan seinni hálfleikinn en þegar tíu mínútur voru eftir skoraði ÍR þrjú mörk í röð og breytti stöðunni í 33-32. Þá kviknaði aftur neisti hjá Selfyssingum og þeir juku forskotið í fimm mörk áður en yfir lauk.
Anton Breki Hjaltason og Guðjón Óli Ósvaldsson voru markahæstir Selfyssinga með 6 mörk, Aron Leo Guðmundsson og Skarphéðinn Steinn Sveinsson skoruðu 5, Sveinn Ísak Hauksson 4, Árni Ísleifsson og Ragnar Hilmarsson 3, Jónas Karl Gunnlaugsson og Valdimar Örn Ingvarsson 2 og þeir Álvaro Mallols, Elvar Elí Hallgrímsson, Jason Dagur Þórisson og Kári Einarsson skoruðu 1 mark hver.
Egill Eyvindur Þorsteinsson og Philipp Seidemann vörðu báðir 5 skot í marki Selfoss og Ísak Kristinn Jónsson 3.
Selfoss er með fullt hús stiga á Ragnarsmótinu og þeir mæta ÍBV á föstudaginn kl. 17:30 í lokaumferð mótsins.
Þetta var annar leikur ÍR á tveimur dögum á Ragnarsmótinu en þeir léku í gærkvöldi gegn Víkingum þar sem Víkingur fór með sigur af hólmi 27-34.