Anna Metta Óskarsdóttir, Umf. Selfoss, varð í gær Íslandsmeistari í 5 km götuhlaupi í flokki 15-17 ára stúlkna þegar hún keppti í Víðavangshlaupi ÍR í miðbæ Reykjavíkur.
Anna Metta hljóp á tímanum 23:30 mínútur.
Eitt HSK met var sett í hlaupinu. Kristinn Þór Kristinsson, Umf. Selfoss, kom níundi í mark í karlaflokki á tímanum 16:10 mín sem er HSK met í 35-39 ára flokki karla. Metið í þessum flokki átti Þorsteinn Magnússon, 18:27 mín sett árið 2016.
Alls tóku 849 þátttakendur þátt í hlaupinu og nokkrir þeirra komu af sambandssvæði HSK. Það þarf ekki að koma á óvart að einn þeirra hafi verið Skeiðamaðurinn Ingvar Garðarsson, en hann hljóp sitt 46. Víðavangshlaup ÍR í röð, sem er einstakur árangur.
