Hvergerðingurinn Anna Guðrún Halldórsdóttir náði frábærum árangri á Heimsmeistaramóti masters í ólympískum lyftingum sem stendur yfir þessa dagana í Aþenu í Grikklandi.
Hún gerði sér lítið fyrir og tryggði sér heimsmeistaratitilinn í 86kg flokki 55-59 ára kvenna með því að snara 55 kg og jafnhatta 80 kg. Hún sigraði því með samtals 135 kg.
Anna Guðrún var álitin sigurstrangleg fyrir mótið en hún varð heimsmeistari árið 2024 og er ríkjandi Evrópumeistari í flokknum.
Hún opnaði snörunina á 53 kg lyftu, missti svo 55 kg í lyftu tvö en kláraði sömu þyngd í lokalyftunni. Hún þurfti þá að lyfta yfir 70 kg í jafnhöttun til að sigra og byrjaði á 73 kílóum sem fóru upp og titillinn þar með tryggður. Anna Guðrún lyfti 76 kg í annarri lyftunni og ákvað síðan að reyna við nýtt Evrópumet í þriðju lyftunni, 80 kg, en hún átti sjálf Evrópumetið í þessum flokki, 79 kg. Hún kláraði lyftuna glæsilega, fékk þrjú hvít ljós og Evrópumetið bætt.
Í dag á Anna Guðrún sex Evrópumet í tveimur þyngdarflokkum W55 og þrátt fyrir að keppnisferill hennar sé ekki langur á hún núna tvo heimsmeistaratitla, eitt silfur á heimsmeistaramóti og þrjá Evrópumeistararatitla.
Gunnar Biering Agnarsson