Það var bongóblíða og frábær stemning á Stokkseyrarvelli í kvöld þar sem Stokkseyringar tóku á móti KM í 5. deild karla í knattspyrnu. Leiknum lauk með 5-1 sigri Stokkseyrar.
Elfar Ísak Halldórsson kom Stokkseyringum yfir með frábæru marki á 17. mínútu en KM jafnaði metin fimm mínútum síðar. Sindri Þór Arnarson var þó fljótur að koma Stokkseyringum aftur yfir því hann skoraði strax í næstu sókn. Steinar Aron Magnússon breytti stöðunni svo í 3-1 á 45. mínútu og þannig stóðu leikar í hálfleik.
Seinni hálfleikurinn var öllu rólegri. Arilíus Óskarsson skoraði fjórða mark Stokkseyrar á 66. mínútu og Steinar Aron bætti fimmta markinu við á þeirri nítugustu.
Fyrir leik voru Stokkseyringar þegar búnir að tryggja sér sæti í úrslitakeppni deildarinnar. Þeir eru og verða í 2. sæti B-riðils, nú með 27 stig en KM er í 8. sætinu með 7 stig.
