Ægir tók á móti Leikni í 1. deild karla í knattspyrnu í kvöld. Leikurinn var í járnum þar til Leiknismenn gerðu út um hann á sjö mínútna kafla undir lokin og sigruðu 0-3.
Það var fátt um færi í fyrri hálfleiknum en bæði lið áttu álitlegar sóknir. Inn vildi boltinn ekki og staðan var 0-0 í hálfleik.
Í seinni hálfleik lifnaði yfir báðum liðum og Ægismenn voru búnir að gera sig líklega áður en Leiknir braut ísinn á 70. mínútu. Í kjölfarið fór allt í skrúfuna hjá Ægi og Leiknir bætti við tveimur mörkum á næstu sjö mínútum. Staðan snögglega orðin 0-3 og engin von um endurkomu hjá Ægi.