Selfoss tók á móti KA í úrvalsdeild karla í handbolta í Set-höllinni Iðu í kvöld. Jafnræði var með liðunum í 45 mínútur en KA stakk af á síðasta korterinu og sigraði 30-36.
Fyrri hálfleikur var jafn og staðan 14–15 í hálfleik. KA byrjaði betur í seinni hálfleik og náði fjögurra marka forskoti en Selfoss tók þá leikhlé og kom til baka í kjölfarið. Selfoss jafnaði 24-24 og þegar rúmar fjórtán mínútur voru eftir var staðan 26-26.
Þá kom afleitur kafli hjá Selfyssingum, gestirnir skoruðu níu mörk gegn fjórum á síðustu tíu mínútunum og enduðu leikinn á fimm mörkum í röð.
Ragnar Hilmarsson var markahæstur Selfyssinga með 8 mörk, Hannes Höskuldsson skoraði 5/1, Hákon Garri Gestsson, Tryggvi Sigurberg Traustason og Þorleifur Tryggvi Ólafsson 4, Sveinn Ísak Hauksson 2 og þeir Skarphéðinn Steinn Sveinsson, Valdimar Örn Ingvarsson og markvörðurinn Alexander Hrafnkelsson skoruðu allir 1 mark.
Alexander varði 7/1 skot í marki Selfoss og var með 16% markvörslu.
Eftir tíu umferðir eru Selfyssingar á botni deildarinnar með 1 stig en KA er í 3. sæti með 14 stig.