Hamar/Þór heimsótti Stjörnuna í Garðabæinn þegar keppni hófst í riðlakeppni úrvalsdeildar kvenna í körfubolta í kvöld. Þetta var hörkuleikur þar sem Stjarnan tryggði sér nauman sigur á lokakaflanum, 84-79.
Stjarnan var skrefinu á undan stærstan hluta 1. leikhluta en staðan var 22-19 að honum loknum. Annar leikhluti var hnífjafn og staðan 42-42 þegar flautað var til hálfleiks.
Hamar/Þór byrjaði betur í seinni hálfleik og náði fljótlega átta stiga forskoti en Stjarnan gerði áhlaup undir lok 3. leikhluta og staðan var 65-64 þegar 4. leikhluti hófst. Í honum náði Stjarnan fljótlega frumkvæðinu og þær sunnlensku eltu allan leikhlutann án þess að ná í skottið á Stjörnukonum.
Jada Guinn fór mikinn í liði Hamars/Þórs, hún var stigahæst með 26 stig og 8 fráköst. Jovana Markovic var sömuleiðis öflug með 17 stig og 10 fráköst.
Hamar/Þór er í neðsta sæti B-riðils með 6 stig en Stjarnan er í 2. sæti með 18 stig.
Stjarnan-Hamar/Þór 84-79 (22-19, 20-23, 23-22, 19-15)
Tölfræði Hamars/Þórs: Jada Guinn 26/8 fráköst, Jovana Markovic 17/10 fráköst, Ana Clara Paz 13/6 fráköst, Mariana Duran 10/8 fráköst/7 stoðsendingar, Bergdís Anna Magnúsdóttir 8, Jóhanna Ýr Ágústsdóttir 5/5 stoðsendingar.