Þór tók á móti Ármanni í risaleik í fallbaráttu úrvalsdeildar karla í körfubolta í Þorlákshöfn í kvöld. Ármann hafði sigur að lokum, 74-79.
Ármenningar byrjuðu betur og leiddu 14-21 eftir 1. leikhluta en Þórsarar svöruðu fyrir sig í 2. leikhluta og staðan var 42-43 í hálfleik.
Þór hafði undirtökin þegar leið á 3. leikhluta og í upphafi þess fjórða var staðan orðin 68-59, Þórsurum í vil. Þá fór allt í skrúfuna hjá þeim grænu, sóknarleikurinn fór allur í handaskol og liðið skoraði aðeins 6 stig á síðustu níu mínútum leiksins.
Ármenningar komust yfir þegar rúmar fimm mínútur voru eftir og slógu ekkert af á lokakaflanum.
Dachon Burk var stigahæstur Þórsara með 29 stig en Djordje Dzeletovic var framlagshæstur með 18 stig og 8 fráköst.
Þegar tvær umferðir eru eftir af deildinni eru Þórsarar í 11. sæti með 10 stig, jafnmörg og Ármann sem er í 10. sæti en Ármenningar standa betur að vígi innbyrðis.
Þór Þ.-Ármann 74-79 (14-21, 28-22, 23-16, 9-20)
Tölfræði Þórs: Dachon Burk 29/7 stolnir, Djordje Dzeletovic 18/8 fráköst, Rafail Lanaras 11/15 fráköst/7 stoðsendingar, Davíð Arnar Ágústsson 6, Lazar Lugic 6/5 fráköst, Haukur Davíðsson 3, Emil Karel Einarsson 1.