Hamar og Álftanes mættust í úrslitaleik C-deildar deildarbikars karla í knattspyrnu á Álftanesi í dag.
Álftanes komst yfir á 19. mínútu og Álftnesingar tvöfölduðu svo forskot sitt undir lok fyrri hálfleiks, 2-0 í leikhléi. Hamar lék allan seinni hálfleikinn manni færri þar sem Arnór Ingi Davíðsson fékk að líta sitt annað gula spjald á lokamínútu fyrri hálfleiks.
Tíu Hvergerðingar náðu að minnka muninn í 2-1 á 50. mínútu með marki Viktors Benediktssonar en nær komust þeir ekki. Álftanes bætti við tveimur mörkum til viðbótar en Rodrigo Depetris skoraði sárabótarmark fyrir Hamar á 90. mínútu. Það voru hins vegar Álftnesingar sem áttu lokaorðið því í uppbótartímanum skoruðu þeir sitt fimmta mark og lokatölur leiksins urðu 5-2.