Meistaramót Golfklúbbsins Flúðir fór fram um síðustu helgi á Selsvelli. Eftir fyrri daginn var stemningin á vellinum vægast sagt með besta móti. Veðurguðirnir buðu upp á glæsilegt golfveður sem 46 hressir þátttakendur nutu sín út í ystu æsar.
Keppnin var hnífjöfn og spennan magnaðist fyrir lokasprettinn. Kylfingarnir voru vel haldnir en boðið var upp á rúgbrauð með miklu smjöri og kæfu áður en lagt var í hann, kaffi og kökur eftir níundu, sveppasúpa á teig 14 og Sweet & Smooth á átjándu.
Úrslitin réðust svo seinni daginn og var magnað að sjá hversu keppendur voru sællegir á svipinn þrátt fyrir að veðrið hafi ekki verið eins gott og fyrri daginn. Klúbbmeistarar urðu Albert Einarsson, sem lék hringina tvo á 173 höggum og Magdalena Þórisdóttir sem lék á 201 höggi.
Umgjörðin á lokahófinu var sérstaklega glæsileg og almenn ánægja með alla skipulagningu. Geir Ólafs sá um dinnertónlistina, boðið var upp á glæsilegan þríréttaðan matseðil, Siggi vallarstarfsmaður og Kata í Kaffi-Sel voru með söngatriði og Arnar Jónsson, hinn ástsæli félagsmaður og leikari, steig á stokk.
Önnur úrslit urðu þau að Ottó Leifsson sigraði í 2. flokki karla, Helga Þóra Þórarinsdóttir í 1. flokki kvenna og Guðrún Pétursdóttir í 2. flokki kvenna. Í karlaflokki 70+ sigraði Elías Kristjánsson og í opna flokknum var punktakeppni þar sem Ottó Leifsson sigraði með 71 punkta en þar á eftir komu Ásbjörn Björnsson með 68 punkta og Tryggvi Þorvaldsson með 67 punkta.
Hér fyrir neðan eru nokkrar svipmyndir frá mótinu og lokahófinu.
