Þeir Aron Fannar Birgisson, leikmaður Selfoss og Þorsteinn Daníel Þorsteinsson, fyrirliði Árborgar, færðu heimahjúkrun HSU á Selfossi í morgun ágóðann sem safnaðist í styrktarleiknum í síðustu viku, alls 6.732.729 krónur.
Þar mættust Selfoss og Árborg í 16-liða úrslitum Gatorade-bikarsins. Leikurinn var jafnframt styrktarleikur fyrir Helgu Guðmundsdóttur, móður Arons Fannars, en hún lést í byrjun síðustu viku. Að ósk Helgu rann allur ágóði leiksins til heimahjúkrunar HSU á Selfossi en það var þjónusta sem hún þurfti að nýta sér í sínum veikindum.
Við styrknum tóku þær Margrét Björk Ólafsdóttir, hjúkrunarstjóri heilsugæslu HSU á Selfossi og Anna Margrét Magnúsdóttir, aðstoðarhjúkrunarstjóri heilsugæslu HSU á Selfossi.
„Heimahjúkrun á HSU Selfossi þakkar Helgu Guðmundsdóttur, fjölskyldu hennar og öllum þeim sem sem lögðu lið við styrkarleik Selfoss og Árborgar þann 8. júlí. Það er mikill heiður að þau skulu ánafna heimahjúkrun ágóðanum og við erum orðlaus yfir þeirri upphæð sem safnaðist. Einnig öllum þeim stuðningi sem samfélagið sýndi. Þetta er mikil viðurkenning á okkar mikilvæga starfi og kemur þetta framlag til með að efla það enn frekar með tækja og búnaðarkaupum. Fyrir hönd heimahjúkrunar segjum við STÓRT TAKK,“ segja þær Margrét Björk og Anna Margrét.
Fjöldi fyrirtækja, einstaklinga og sjálfboðaliða hjálpaði til við að gera leikinn að veruleika. Knattspyrnudeild Selfoss og Knattspyrnufélag Árborgar vilja færa innilegar þakkir til allra þeirra fyrirtækja og einstaklinga sem lögðu verkefninu lið. „Stuðningur ykkar skipti sköpum í þessu verkefni og það er ómetanlegt að sjá samfélagið okkar stendur saman þegar á þarf að halda,“ segir í tilkynningu frá félögunum.
Þau fyrirtæki sem studdu verkefnið voru Ölgerðin, Stubbur, Röstí, Nettó, Prentverk Selfoss, Fagform, Kjörís, Hótel Selfoss, Kjötbúrið, Bíóhúsið, Pylsuvagninn, Starfsfólk Nettó á Selfossi og starfsfólk Pylsuvagnsins.