Það voru sveiflur og spenna í fyrri Suðurlandsslag vetrarins í 1. deild kvenna í körfubolta í dag. Þór Þorlákshöfn tók á móti Selfossi þar sem gestirnir fögnuðu naumum sigri, 84-86.
Þórskonur voru frábærar í 1. leikhluta, þær skoruðu fyrstu sjö stig leiksins og leiddu 31-18 að loknum 1. leikhluta. Það var allt annað að sjá til Selfyssinga í 2. leikhluta þar sem þær sneru leiknum algjörlega sér í vil en staðan var 42-50 í hálfleik.
Leikurinn var í járnum í 3. leikhluta, Selfoss varði forskotið en Þór tókst að minnka muninn í eitt stig og staðan var 68-69 þegar fjórði leikhluti hófst. Í honum elti Þór Selfoss eins og skugginn en tókst ekki að komast yfir. Þór skoraði síðustu fimm stig leiksins en þá var tíminn úti og Selfoss fagnaði sigri.
Shawnteanna Tillman var stigahæst Þórsara með 41 stig, Antoaneta Alexe skoraði 14 og Sigrún Elfa Ágústsdóttir 13. Hjá Selfyssingum var Kennedi Watkins stigahæst með 25 stig og 11 fráköst, Valdís Una Guðmannsdóttir skoraði 24 stig og Sigríður Svanhvít Magnúsdóttir og Mariana Duran skoruðu 12 auk þess sem Sigríður tók 11 fráköst og Duran sendi 10 stoðsendingar.
Selfoss og Þór hafa bæði 2 stig eftir tvær umferðir, Selfoss er í 3. sæti en Þór í því sjötta eins og stendur.