Ægir fékk heldur betur skell gegn Njarðvík í uppgjöri toppliðanna í 2. deild karla í knattspyrnu í kvöld. Liðin mættust í Njarðvík og þar stýrðu heimamenn umferðinni frá A-Ö.
Njarðvík komst í 4-0 í fyrri hálfleik og þrátt fyrir fimm skiptingar á fyrsta korterinu í seinni hálfleik tókst Nenad Zivanovic, þjálfara Ægis, ekki að hressa upp á liðið sitt. Njarðvíkingar bættu við tveimur mörkum um miðjan seinni hálfleikinn og lokatölur urðu 6-0.
Ægir er nú í 2. sæti deildarinnar með 19 stig og þar fyrir neðan er Þróttur með 16 stig og leik til góða. Njarðvíkingar sitja öruggir í toppsætinu með 22 stig.