Ægismenn eru fallnir niður í 2. deildina í knattspyrnu eftir 6-1 tap gegn Leikni á útivelli í 1. deildinni í kvöld. Ægir hefur ekki unnið leik í deildinni síðan 31. maí.
Leiknir hafði mikla yfirburði í leiknum í kvld, þeir voru komnir í 3-0 eftir rúmar tuttugu mínútur og fjórða markið kom skömmu síðar. Harley Willard minnkaði muninn í 4-1 með snyrtilegu marki á 40. mínútu og þannig sstóðu leikar í hálfleik.
Í seinni hálfleiknum átti Ægir fá svör við góðum leik Leiknismanna. Heimaliðið jók forskotið á 55. mínútu og um miðjan seinni hálfleikinn var staðan orðin 6-1 og þær urðu lokatölur leiksins.
Ægir er með 8 stig á botni deildarinnar þegar þrjár umferðir eru eftir, tólf stigum á eftir Völsungi og Grindavík.