Margir segja að hringtorgin í Mosfellbæ séu óteljandi. Hvort þau hafi haft áhrif í kvöld skal ósagt látið en leikur Ægismanna gegn Aftureldingu í 1. deild karla í knattspyrnu í kvöld fór í hringavitleysu. Afturelding sigraði 8-1 og Ægismenn gengu niðurlútir af velli.
Afturelding komst yfir strax á 2. mínútu og heimamenn tvöfölduðu svo forskotið á 37. mínútu. Bjarki Rúnar Jónínuson átti lokaorðið í fyrri hálfleik, hann skoraði gott mark á 45. mínútu, rétt áður en flautað var til leikhlés.
Varnarleikur Ægis var ekki til útflutnings fyrsta korterið í seinni hálfleik og Afturelding skoraði þrjú mörk á þessum kafla. Til að bíta höfuðið af skömminni lét Stefan Dabetic reka sig útaf á 61. mínútu fyrir fólskulegt brot og Ægismenn því manni færri síðasta hálftímann. Þarna var staðan orðin 5-1 og úrslitin ráðin en Afturelding skoraði þrjú mörk á síðasta hálftímanum og Ægismenn áttu sér ekki viðreisnar von.
Ægir er í 11. sæti deildarinnar með 8 stig en Afturelding er í 2. sætinu með 22 stig.