Ægir vann sinn fyrsta leik í 1. deild karla í knattspyrnu í sumar þegar ÍR kom í heimsókn á Þorlákshafnarvöll í kvöld.
Fyrri hálfleikurinn var tíðindalítill en Ægismenn fengu betri færi en Jordan Adeyemo átti stangarskot á 21. mínútu. Staðan var 0-0 í hálfleik.
Það lifnaði heldur betur yfir leiknum í seinni hálfleiknum og mörkin komu á færibandi. Jordan Adeyemo braut ísinn á 52. mínútu þegar hann slapp innfyrir og skoraði eftir skógarhlaup markmanns ÍR. Aðeins þremur mínútum síðar átti Ægir góða sókn sem lauk með góðu skoti Nikola Kristins Stojanovic og boltinn söng í netinu. ÍR gerði fjórfalda skiptingu í kjölfarið og þeir hresstust mikið við það. Gestirnir sóttu stíft og uppskáru vítaspyrnu á 71. mínútu og minnkuðu þar muninn í 2-1.
Og fjörið var ekki búið. Ægir svaraði strax aftur fyrir sig en Atli Rafn Guðbjartsson skoraði af stuttu færi á 75. mínútu eftir hamagang í vítateig ÍR. Gestirnir voru meira með boltann á síðasta korterinu en færin voru af skornum skammti. Það var hins vegar Ægir sem átti lokaorðið. Adeyemo skoraði glæsilegt mark í uppbótartímanum, kassaði boltann niður í vítateignum og hamraði hann í netið.
Ægir lyfti sér af botninum með sigrinum í kvöld, en er ennþá í fallsæti. Ægir er í 11. sæti með 4 stig eftir sex umferðir en ÍR er í 8. sætinu með 7 stig.