Ægir tapaði í fjörugum leik

Atli Rafn Guðbjartsson skoraði fyrir Ægi. sunnlenska.is/Guðmundur Karl

Ægismenn töpuðu 2-3 gegn Reyni frá Sandgerði í hörkuleik í 3. deild karla í knattspyrnu í Þorlákshöfn í dag.

Elton Futura Barros, fyrrum leikmaður Selfoss, kom Reyni yfir á 9. mínútu leiksins en Atli Rafn Guðbjartsson jafnaði metin þremur mínútum síðar. Fjörið var ekki búið því aðeins tveimur mínútum eftir jöfnunarmarkið komust Reynismenn aftur yfir.

Mörkin urðu ekki fleiri í fyrri hálfleik og staðan var 1-2 í leikhléi, en strax á 2. mínútu síðari hálfleiks jafnaði Anton Breki Viktorsson metin fyrir Ægismenn. Reynir skoraði sigurmarkið um miðjan seinni hálfleikinn og Ægismönnum tókst ekki að jafna í þriðja sinn í leiknum, þrátt fyrir ágætar tilaunir.

Ægismenn eru áfram í 9. sæti deildarinnar með 17 stig, tveimur stigum frá fallsæti, en Reynir er í hörkubaráttu um toppsætið og hefur 35.