Ægir tók á móti nágrönnum sínum frá Grindavík í lokaumferð 1. deildar karla í knattspyrnu í Þorlákshöfn í dag. Ægismenn voru löngu fallnir en Grindavík varð að sigra í dag til að tryggja sæti sitt í deildinni.
Svo fór ekki. Leiknum lauk með 1-1 jafntefli og Ægir tók því Grindavík niður með sér því Völsungur sigraði Gróttu á sama tíma. Húsvíkingar björguðu sér þar með á ótrúlegan hátt frá falli, með því að sigra í síðustu tveimur leikjum sumarsins.
Jafnræði var með liðunum í Þorlákshöfn í dag, Grindavík komst yfir á 16. mínútu og staðan var 0-1 í hálfleik. Daníel Karl Þrastarson jafnaði metin á 62. mínútu og reyndist það eina mark síðari hálfleiksins.
Ægir varð í 12. og neðsta sæti deildarinnar með 9 stig en Grindavík var í 11. sæti með 25 stig, einu stigi á eftir Völsungi. Ægir og Grindavík leika því í 2. deildinni að ári.