Ægismenn gerðu sitt besta til að spilla þjóðhátíðargleðinni á Ísafirði í dag, þegar þeir heimsóttu Vestra í 1. deild karla í knattspyrnu.
Leikurinn fór fram í kulda og roki, sem setti nokkuð mark sitt á leikinn. Vestramenn byrjuðu betur og voru komnir í 2-0 eftir rúmar tuttugu mínútur en Harley Willard minnkaði muninn með glæsimarki á 25. mínútu. Ægismenn voru svo nálægt því að jafna þegar Bjarki Rúnar Jónínuson skaut í stöngina skömmu síðar, en inn vildi boltinn ekki og staðan var 2-1 í hálfleik.
Vestri bætti þriðja markinu við á 56. mínútu og strax í næstu sókn var Willard nálægt því að minnka muninn aftur en skot hans fór í þverslána. Það var hins vegar Bjarki Rúnar sem breytti stöðunni í 3-2 þegar korter var eftir af leiknum. Jordan Adeyemo fiskaði þá vítaspyrnu og Bjarki skoraði af öryggi af punktinum.
Bæði lið hefðu getað bætt við mörkum á lokakaflanum og Ægismenn áttu frábæra marktilraun í uppbótartímanum þegar Kristinn Ásgeir Þorbergsson átti magnað skot að marki en Marvin Darri Steinarsson, markvörður Vestra, gerði ennbetur í að verja og bjargaði sigri sinna manna.
Ægir er í 11. sæti deildarinnar með 7 stig en Vestri er í 4. sæti með 16 stig.