Ægir er kominn í 16-liða úrslit bikarkeppni karla í knattspyrnu eftir stórsigur á Árbæ í dag en Selfyssingar eru úr leik eftir naumt tap gegn Stjörnunni.
Ægir heimsótti Árbæ á Leiknisvöll í Breiðholti og þar kom Einar Breki Sverrisson þeim yfir strax á 8. mínútu. Bjarki Rúnar Jónínuson bætti við marki á 28. mínútu en Árbæingar minnkuðu muninn í 2-1 fjórum mínútum síðar og þannig stóðu leikar í hálfleik.
Ægir hafði mikla yfirburði í seinni hálfleiknum og bættu við fimm mörkum. Harley Willard kom inn af bekknum og skoraði tvisvar og þeir Atli Rafn Guðbjartsson, Kristinn Ásgeir Þorbergsson og Jordan Adeyemo bættu allir við mörkum. Lokatölur 1-7.
Selfoss sem leikur í 2. deildinni heimsótti úrvalsdeildarlið Stjörnunnar í Miðgarð í Garðabæ. Selfyssingar voru líklegri í fyrri hálfleik en staðan var 0-0 í leikhléi.
Stjarnan komst yfir strax í upphafi seinni hálfleiks og bætti svo við öðru marki um hann miðjan. Spenna hljóp í leikinn á lokakaflanum eftir að Einar Bjarki Einarsson minnkaði muninn í 2-1 með glæsilegu skallamarki fimm mínútum fyrir leikslok. En Stjarnan hélt fengnum hlut og fagnaði sigri.