Alls er 31 keppandi skráður til leiks í torfærukeppninni á Hellu sem fram fer á morgun, laugardaginn 2. maí. Aðeins fimm sinnum í sögu Hellutorfærunnar hafa keppendur verið fleiri en 30 og má segja að það sé rúmlega helmingur þeirra sigurstranglegir og allflestir hafa staðið á verðlaunapalli.
Keppni hefst í Tröllkonugili, austan við Hellu, kl. 10 og stendur til klukkan 16. Bein útsending verður frá keppninni á Youtube og Rúv 2 fyrir þá sem ekki komast á staðinn.
Meðal keppenda á morgun eru nokkrir sem eru að keppa í sinni fyrstu keppni, aðrir sem hafa verið með í áraraðir og enn aðrir sem eru að koma til baka eftir mislöng hlé. Á meðal keppenda eru Íslandmeistararnir Bjarnþór Elíasson og Finnur Bárðarson. Athyglisverðasti keppandinn, að öðrum ólöstruðum er heimakonan Telma Lind Árnadóttir. Hún er 17 ára og mætir á nýsmíðaðri Túttu og ætlar ekki að gefa strákunum neitt eftir. Níu ár eru síðan kona keppti síðast í torfæru.
Kjöraðstæður eru fyrir áhorfendur í brekkunum í Tröllkonugili til að fylgjast með þessum 1000 hestafla græjum reyna fyrir sér í sandbrekkum og börðum. Keppnin nær síðan hámarki með fleytingum í Þorleifslæk.