Aðeins örfáir dagar eru þar til Hengill Ultra fer fram í Hveragerði, laugardaginn 6. júní. Hlaupið verður nú haldið í fimmtánda sinn og stefnir í eitt fjölmennasta ár í sögu viðburðarins.
Alls hafa nú 950 þátttakendur frá 38 þjóðlöndum skráð sig til leiks og hafa aldrei áður jafn margir erlendir hlauparar tekið þátt í Hengli. Stærstu erlendu hóparnir eru frá Bandaríkjunum, Bretlandi, Danmörku, Noregi, Póllandi og Þýskalandi.
Að sögn Einars Bárðarsonar, eins mótshaldara, er mikil tilhlökkun meðal hlaupara, sjálfboðaliða, skipuleggjenda og íbúa Hveragerðis sem á hverju ári taka á móti hundruðum gesta vegna viðburðarins.
„Það er alltaf sérstök tilfinning þegar síðustu dagarnir fyrir Hengil renna upp. Þá fer maður að finna spennuna hjá hlaupurunum, sjálfboðaliðunum og bæjarbúum. Hveragerði hefur tekið þessum viðburði opnum örmum frá upphafi og í dag er Hengill Ultra orðinn fastur hluti af sumrinu hjá mörgum hlaupurum, bæði íslenskum og erlendum,“ segir Einar.
Hann bendir jafnframt á að núverandi skipuleggjendur hafi fyrst og fremst verið að byggja ofan á þann grunn sem lagður var í upphafi.
„Sá hópur sem hefur stýrt hlaupinu frá árinu 2017 hefur alltaf litið svo á að við séum að halda áfram því góða starfi sem Skokkhópur Hamars í Hveragerði hóf árið 2012 undir forystu frumkvöðulsins og goðsagnarinnar Péturs Frantzsonar. Án þess frumkvæðis væri Hengill Ultra ekki sá viðburður sem hann er í dag.“
Frá 5 kílómetrum upp í 106 kílómetra
Keppendur geta valið um fimm vegalengdir; 5 km, 10 km, 26 km, 53 km og 106 km. Skráningu í lengstu vegalengdirnar hefur þegar verið lokað en enn eru síðustu sætin í boði í styttri hlaupunum. Mikil fjölgun hefur verið í skráningum í 5 km og 10 km brautirnar síðustu daga en þær vegalengdir hafa notið vaxandi vinsælda meðal nýliða, fjölskyldna og þeirra sem vilja upplifa stemninguna í kringum viðburðinn án þess að hlaupa ultra vegalengd.
Hveragerði í hátíðarbúningi
Hengill Ultra er orðið mun meira en hlaup eitt og sér. Um helgina verður fjölbreytt dagskrá í Hveragerði fyrir bæði þátttakendur og gesti. Íþróttahúsið verður opið sem Expó-svæði með sölusýningu fyrirtækja tengdum hlaupum, útivist og heilsu. Við Péturstorg verður hið vinsæla Götugrill Kjötbúrsins og SS opið frá hádegi þar sem bæði keppendur og gestir geta komið saman og notið dagsins. DJ Eva Mey sér um tónlistina við götugrillið síðdegis og síðar mæta Hreimur og félagar og halda uppi stemningunni þegar fyrstu hlaupararnir streyma í mark.
Hlaupaveisla sem spannar alla helgina
Dagskráin hefst í Reykjavík miðvikudaginn 3. júní með fyrstu afhendingu keppnisgagna í Útilíf í Skeifunni og brautarkynningu sem verður jafnframt streymt á Facebooksíðu Útilífs.
Á föstudagskvöldinu verður síðan ræst í lengstu vegalengdina, 106 km, frá Péturstorgi í miðbæ Hveragerðis. Á laugardeginum taka svo við ræsingar í 53 km, 10 km, 26 km og 5 km vegalengdirnar ásamt fjölbreyttri dagskrá í miðbænum.
Skipuleggjendur búast við að þúsundir gesta leggi leið sína til Hveragerðis yfir helgina og segja allt tilbúið fyrir stærstu Hengilshelgi til þessa.
Nánari upplýsingar, dagskrá og síðustu laus sæti má finna á hengillultra.is