Hamar, KFR og Árborg unnu öll góða sigra í 4. deild karla í knattspyrnu í dag. Og það vantaði ekki mörkin í leikina. Samtals voru skoruð 27 mörk í leikjunum þremur.
Mesta markasúpan var á Grýluvelli þar sem Hamar fékk ÍH í heimsókn. Hvergerðingar voru ekki með fyrstu tuttugu mínúturnar og þá var staðan orðin 0-3 fyrir ÍH. En Hamarsmenn hættu ekki. Rodrigo Depetris og Brynjólfur Þór Eyþórsson minnkuðu muninn í 2-3 og þannig var staðan í hálfleik. Seinni hálfleikurinn var algjör veisla. Arnór Ingi Davíðsson og Brynjólfur Þór skoruðu á fyrsta korterinu og staðan orðin 4-3 fyrir Hamar. ÍH jafnaði 4-4 á 72. mínútu en Hamar átti lokaorðið. Depetris kom Hamri aftur yfir á 74. mínútu og Guido Rancez skoraði tvisvar með stuttu millibili. Ótrúlegur viðsnúningur hjá Hamri og leiknum lauk með 7-4 sigri þeirra.
KFR var líka í miklu stuði gegn Vængjum Júpíters á Helluvelli. Hákon Kári Einarsson kom þeim yfir á 4. mínútu og á eftir fylgdu mörk frá Helga Val Smárasyni og Bjarna Þorvaldssyni, 3-0 í hálfleik. Vængir minnkuðu muninn í upphafi seinni hálfleiks en Helgi Valur breytti stöðunni í 4-1 um miðjan seinni hálfleikinn. Bjarni Þorvaldsson tryggði sigurinn svo endanlega á 83. mínútu en Vængir áttu lokaorðið og þeir náðu að skora tvisvar í uppbótartímanum. Tumi Tómasson, markvörður KFR, fékk sitt seinna gula spjald á 91. mínútu fyrir brot, þannig að Bjarni tók við hönskunum og þurfti að hirða boltann tvisvar úr netinu. Lokatölur 5-3.
Árborg fékk Hafnir í heimsókn á Selfossvöll og þar var blásið til sóknar. Þormar Elvarsson braut ísinn strax á 3. mínútu, David Dabrowski tvöfaldaði forskotið á 14. mínútu og Þorkell Þráinsson skoraði þriðja markið fjórum mínútum síðar. David bætti við öðru marki á 23. mínútu og Gestur Helgi Snorrason skoraði fimmta mark Árborgar á 33. mínútu. David var ekki hættur, hann innsiglaði þrennuna á 43. mínútu og staðan var 6-0 í hálfleik. Seinni hálfleikurinn var öllu rólegri en nýstúdentinn Freyr Héðinsson skoraði tvívegis á síðustu fimm mínútum leiksins og niðurstaðan varð 8-0 sigur Árborgar.
Staðan í deildinni er þannig að Árborg er í 2. sæti með 10 stig, Hamar í 3. sæti með 9 stig og KFR í 7. sæti með 3 stig.