Handknattleiksdeild Selfoss hefur ráðið Þóri Ólafsson, fyrrum landsliðsmann í handbolta, sem formann fagráðs handknattleiksdeildar Selfoss.
Í tilkynningu frá stjórn handknattleiksdeildarinnar segir að Þórir verði faglegur ráðgjafi stjórnar deildarinnar, hann verður þjálfurum meistaraflokkanna beggja til halds og trausts og mun taka þátt í æfingum flokkanna og veita þjálfurum ráðgjöf.
Fagráð handknattleiksdeildar Selfoss er auk Þóris skipað þeim Einari Guðmundssyni, yfirþjálfara handknattleiksdeildar Selfoss og landsliðsþjálfara U-19 og Vésteini Hafsteinssyni, frjálsíþróttaþjálfara.
Þórir sem á farsælan feril sem atvinnumaður í handbolta að baki hóf feril sinn á Selfossi, hann spilaði síðan með Haukum og varð Íslandsmeistari með þeim í þrígang á árunum 2003-2005.
Hann fór síðan til Þýskalands og spilaði með TuS-N-Lübbecke við góðan orðstír áður en hélt til Póllands árið 2011, en þar spilaði Þórir fyrir Vive Targi Kielce til ársins 2014 áður en hann kom heim að nýju. Hann spilaði fyrir Stjörnuna á síðasta keppnistímabili.
Þórir hefur spilað 112 landsleiki fyrir Íslands hönd og skorað 277 mörk í þeim. Hans fyrsti landsleikur var á móti Bandaríkjunum í janúar 2001.
Þórir tók þátt í fimm stórmótum fyrir Íslands hönd; EM í Sviss 2006, HM í Svíþjóð 2011, EM í Serbíu 2012, HM á Spáni 2013 og EM í Danmörku 2014. Síðasti landsleikur hans var á móti Svartfjallalandi í nóvember 2014.