Stjórn handknattleiksdeildar Selfoss hefur frá og með deginum í dag sagt upp samningi við Zoran Ivic og Sebastian Alexanderson sem þjálfað hafa Olísdeildarlið kvenna hjá Selfoss frá vordögum 2016.
Uppsögn tekur þegar gildi.
Í tilkynningu frá stjórn handknattleiksdeildarinnar er þeim þakkað fyrir ágæt störf fyrir handknattleiksdeild Selfoss og um leið tilkynnist að við liðinu munu taka þeir Grímur Hergeirsson og Árni Steinn Steinþórsson og hefja þeir störf í dag.
Selfoss er í næst neðsta sæti Olís-deildarinnar með 8 stig. Liðið komst í undanúrslit bikarkeppninnar um helgina og tapaði þar fyrir Stjörnunni.