Ægismenn hafa verið duglegir við að bæta við sig nýjum leikmönnum síðustu daga fyrir átökin í 2. deild karla í knattspyrnu, hvar Þorlákshafnarliðið er nýliði.
Markvörðurinn Hugi Jóhannesson er kominn á láni frá KR. Hugi er fæddur árið 1992 og hefur æft með Ægi í vetur. Þá hafa Ægismenn fengið Hauk Má Ólafsson til sín, hann er 26 ára sóknarmaður sem kemur frá Létti í Breiðholti, þar sem hann hefur verið iðinn við markaskorun undanfarin ár í 3. deildinni.
Marteinn Gauti Andrason hefur einnig gengið til liðs við Ægi en hann er 21 árs miðjumaður sem kemur frá ÍR. Marteinn lék 9 leiki og skoraði 1 mark með ÍR í 1. deildinni í fyrra.
Þá er miðvörðurinn Ivan Razumovic kominn með leikheimild með Ægi á nýjan leik og Pálmi Þór Ásbergsson kominn aftur til félagsins á lánssamningi frá Selfossi.
Fótbolti.net greindi frá þessu