„Þetta var æðislegt mark“

Framherjinn Sævar Þór Gíslason er markahæsti leikmaður Selfoss, Fylkis og ÍR í efstu deild karla í knattspyrnu.

Sævar klíndi inn stórglæsilegu marki í leiknum gegn Grindavík í gær. Hann varð því markahæstur Selfyssinga í deildinni í sumar – og dugðu fimm mörk til þess.

Sævar lék með ÍR í efstu deild árið 1998 og varð þá markahæstur með 6 mörk. Árin 2001 til 2006 skoraði hann svo 41 mark fyrir Fylki í efstu deild.

Markahrókurinn var ánægður með markið sem hann skoraði í gær. „Já, þetta var æðislegt mark, gaman að smellhitta hann svona. Ingþór var búinn að reyna þrjú skot á undan mér og ég ákvað bara að kenna honum þetta,“ sagði Sævar og glotti.

„Það að vera markakóngur þriggja liða í efstu deild er eitthvað sem ég er mjög stoltur af. Án þess að hafa skoðað það nokkuð þá hugsa ég að þetta sé einstakt.“