„Þeir eltu okkur allan tímann“

„Þetta var bara frábært í kvöld. Það gekk allt upp sem við skipulögðum fyrir leikinn,“ sagði Jón Daði Böðvarsson, besti maður Selfoss í 0-4 sigri á Grindavík í kvöld.

„Við erum góðir á boltann og létum hann rúlla, þeir eltu okkur allan tímann og það skóp þennan sigur,“ sagði Jón Daði sem var mjög ógnandi í fyrri hálfleik. Hann skoraði fyrsta mark liðsins og lagði upp það þriðja sem gerði endanlega út um leikinn.

„Við töluðum um það að þeir myndu mæta dýrvitlausir í seinni hálfleikinn og ákváðum að þétta vörnina. Markið hans Tomma var frábært og síðan gerði Viðar virkilega vel í vítinu og þá var þetta bara komið. Þetta var bara frábært.“

Tveir sigurleikir í röð hafa greinilega hleypt sjálfstrausti í lið Selfoss sem leit virkilega vel út í kvöld. Jón Daði er sammála því að það var allt annað að sjá til liðsins.

„Þetta er búið að vera algjört þunglyndi í síðustu leikjum, tap, tap, tap og aftur tap. Sigurinn gegn Fram gaf okkur virkilega gott sjálfstraust og það sást alveg í dag. Það er búinn að vera stígandi í liðinu og þetta er alltaf að verða betra og betra. Við erum að taka vel á því á æfingum og erum að æfa aukalega saman og tölum mikið um hvað við getum gert betur. Vonandi verður þetta bara jákvætt framundan hjá okkur,“ sagði Jón Daði Böðvarsson að lokum.