Ökumaður vöruflutningabíls slapp ómeiddur þegar eldur kviknaði í bílnum á Mýrdalssandi í gærkvöldi.
„Bílstjórinn varð var við eitthvað skrítið og stoppaði og þá var kominn upp eldur í bílnum. Hann komst út en þegar við komum á vettvang þá var ökumannsrýmið alelda. Kassinn á bílnum skemmdist einnig en tengivagn sem var aftan í bílnum slapp,“ sagði Sigurður Gýmir Bjartmarsson, varaslökkviliðsstjóri hjá slökkviliðinu í Vík, í samtali við sunnlenska.is, en útkallið barst klukkan 20:09.
„Þetta gekk vel og við vorum tiltölulega fljótir að slökkva en það tók tíma að slökkva glæður sem leyndist í farminum í kassanum,“ sagði Sigurður en um tuttugu slökkviliðsmenn komu á vettvang, tíu frá Vík og tíu frá Klaustri.
Umferð um Suðurlandsveg var stöðvuð vegna þessa og var vegurinn lokaður í um eina og hálfa klukkustund.