Á fimmtudag leggur Vorlestin af stað hringinn í kringum landið og er fyrsti viðkomustaðurinn Hvolsvöllur, en sama dag verður líka stoppað í Vík og á Klaustri.
Vorlestin er verkefni sem Jötunn Vélar á Selfossi stendur fyrir ásamt fjórum öðrum fyrirtækjum sem leggja land undir fót og kynna vörur og þjónustu fyrirtækjanna. Auk Jötuns eru það Lífland, Mjöll/Frigg, Landsbankinn og Skeljungur.
Alls verður stoppað á fimmtán stöðum umhverfis landið næstu sjö dagana en hringnum verður lokað á Selfossi þann 4. maí.
Þetta er þriðja árið sem Vorlestin fer um landið og hefur henni alltaf verið vel tekið og mæting gesta góð á áfangastöðunum fimmtán.
Þeir sem heimsækja Vorlestina geta tekið þátt í spurningaleik þar sem vinningarnir eru veglegir, aðalvinningurinn er utanlandsferð.