Fimmtudagskvöldið 26. mars stendur Foreldrafélag Sunnulækjarskóla fyrir svokallaðri Foreldrapásu á veitingastaðnum Byrja á Selfossi.
Viðburðurinn er að fyrirmynd skandinavískra foreldrafélaga en um er að ræða barnlaust skemmtikvöld þar sem foreldra skóla- og bekkjarsystkina hittast, spjalla, kynnast og tengjast.
„Frá því að við byrjuðum í stjórn foreldrafélagsins hafa alltaf öðru hvoru komið til okkar foreldrar barna í skólanum sem hafa búið í Skandinavíu. Þau hafa talað um það að sumsstaðar tíðkist það að foreldrar hittist barnlaus að kvöldi til til þess að kynnast og efla tengslin,“ segir Dagný Hróbjartsdóttir, ein af skipuleggjendum Foreldrapásunnar, í samtali við sunnlenska.is.
„Við höfum alltaf verið spennt fyrir þessari hugmynd en þó hikandi þar sem ekki er menning fyrir þessu hér á landi. Núna eftir áramót ákváðum við þó að taka af skarið og prófa að halda slíkan viðburð,“ segir Dagný.
Ekkert vandræðalegt hópefli
Í Foreldrapásunni, sem hefst klukkan 20:00, verður meðal annars Kahoot Pub Quiz sem Már Ingólfur Másson stendur fyrir en hann hefur áratuga langa reynslu af því að semja skemmtilegar spurningar sem hitta í mark. Engin önnur formleg dagskrá er á Foreldrapásunni og á Facebook-viðburðinum er sérstaklega tekið fram að þetta sé ekki fundur og það verður ekkert vandræðalegt hópefli.
„Markmiðið er að fá foreldra barna í Sunnulækjarskóla til þess að koma saman í frjálslegu umhverfi, njóta samveru og kynnast hvert öðru. Enginn fyrirlestur, engin fræðsla, ekkert hópefli, bara gaman.“
„Við höfum fengið mjög jákvæð viðbrögð og margir hafa komið til okkar til að hrósa fyrir framtakið. Við vonumst bara til að sem flestir mæti og taki sér smá pásu frá barnauppeldi og amstri hversdagsins.“
Vonast við góðum viðtökum
Dagný segir að ef vel gangi á fimmtudagskvöldið þá megi geri ráð fyrir að þetta verði að reglulegum viðburði. „Vonandi fer mætingin fram úr björtustu vonum. Í framtíðinni er svo möguleiki á að þróa viðburðinn frekar og bjóða þá kannski upp á tvö skemmtikvöld, annars vegar fyrir yngra stig og hins vegar fyrir eldra stig. Eða jafnvel að hver árgangur haldi sitt eigið foreldrakvöld, sem væri náttúrulega draumurinn.“
„Við viljum hvetja alla foreldra barna í Sunnulækjarskóla til að mæta á Byrja á fimmtudaginn kl 20:00. Már mætir með lauflétt Kahoot fyrir okkur og svo er bara að spjalla við mann og annan. Okkur langar að henda því fram sem áskorun að allir prufi að tala við að minnsta kosti einn sem þeir hafa ekki spjallað við áður,“ segir Dagný ennfremur.