Fimmtudagskvöldið 12. mars næstkomandi verða haldnir styrktartónleikar á Hótel Selfossi fyrir Sigurhæðir. Húsið opnar klukkan 19:00 og hefjast tónleikarnir klukkan 20:00.
Hugmyndin að tónleikunum kviknaði síðasta sumar og eru þeir haldnir í tilefni af 5 ára afmæli Sigurhæða, sem er 20. mars. Tilgangur tónleikanna er tvíþættur; að vekja athygli á Sigurhæðum og safna fé fyrir áframhaldandi starfsemi.
Sigurhæðir, sem er þolendamiðstöð fyrir þolendur kynbundins ofbeldis á Suðurlandi, er fyrsta og eina úrræðið sinnar tegundar á Suðurlandi og er það ætlað konum 18 ára og eldri.
Úrvalslið tónlistarfólks
Fyrir tónleikana verður svokallaður „pop-up“ markaður þar sem fyrirtæki selja og auglýsa sínar vörur ásamt því að gefa vinninga í happdrætti.
Soroptimistaklúbbur Suðurlands sér um tónleikana og er markmið viðburðarins að safna fjármunum til stuðnings mikilvægu og samfélagslega þýðingarmiklu starfi Sigurhæða.
Á tónleikunum mun fjöldinn allur af tónlistarfólki koma fram en það á það sameiginlegt að vera með tengingu við Suðurland á einn eða annan hátt; Magnús Kjartan, LayLow, Aldís Elva & Heiðar Óli, Jórukórinn og Una Torfa munu öll gefa vinnu sína ásamt því að Anna Steinsen mun veislustýra kvöldinu.
Þörfin hefur sýnt sig frá upphafi
Um síðustu áramót urðu Sigurhæðir sjálfseignarstofnun. Reksturinn er því kominn úr höndum Soroptimistaklúbbs Suðurlands sem stofnaði Sigurhæðir en Soroptimistaklúbbskonur eru þó áfram sjálfboðar á vakt þegar starfsemi er í húsinu.
„Alveg frá upphafi hefur þörfin sýnt sig en um 400-450 konur hafa nýtt sér þjónustu Sigurhæða síðan þær hófu starfsemi sína. Sigurhæðir þjónusta svæðið allt austur á Höfn og til Vestmannaeyja og er starfsemin eingöngu rekin á styrkjum. Það er leiðinlegt að þurfa endalaust að væla út peninga frá hinu opinbera til að halda starfseminni gangandi,“ segir Anna Björg Stefánsdóttir, framkvæmdastjóri Sigurhæða, í samtali við sunnlenska.is
Fimm meðferðaraðilar starfa hjá Sigurhæðum og er starfsemi þrjá daga í viku. Fjórar þolendamiðstöðvar eru á landinu og eru Sigurhæðir eina stöðin á Suðurlandi.
Gæti orðið árlegur viðburður
Þetta er í fyrsta skipti sem er svona stór viðburður er skipulagður fyrir Sigurhæðir.
„Þetta er líka í fyrsta skipti sem við erum sjálfar að skipuleggja viðburð til styrktar Sigurhæðum. Það er full ástæða til að hvetja alla sem vettlingi geta valdið að mæta og eiga góða stund.“
„Við vonumst til að samfélagið standi með okkur og komi á tónleikana. Þetta eru flott tónlistaratriði fyrir allan aldur. Ef tónleikarnir heppnast vel þá má alveg hugsa sér að við gerum þetta árlega,“ segir Anna Björg að lokum.
Hægt er að kaupa miða á tónleikana hér.