Von á krapa á Hellisheiði

Úrkomusvæði nálgast nú landið úr suðvestri og frá því kemur til með að snjóa á hærri fjallvegum, en krapi og bleytusnjór ofan um 200-300 m.

Fyrst á Hellisheiði og Mosfellsheiði fljótlega eftir að birtir og víðast á landinu um og eftir hádegi. Suðvestanlands hlýnar hins vegar og hlánar síðdegis.

Þetta kemur fram í ábendingu veðurfræðings á heimasíðu Vegagerðarinnar.

Hálkublettir eru á milli Víkur og Kirkjubæjarklausturs. Annars eru allar helstu leiðir á landinu greiðfærar.

Vakin er athygli á að hálendisvegir eru nú víða orðnir ófærir. Skemmdir hafa orðið á austasta hluta Fjallabaksleiðar nyrðri (F208) og er vegurinn því lokaður.

Brúin yfir Eldvatn við Ása er lokuð vegna skemmda.