Stjórn VIRK ákvað í desember að veita sérstaka styrki til sex úrræða um allt land sem veita þolendum kynferðisofbeldis þjónustu.
Um er að ræða þriggja milljón króna styrki en meðal úrræða sem fékk styrk var Sigurhæðir á Suðurlandi.
Auk Sigurhæða voru Bjarkarhlíð, Stígamót, Kvennaathvarfið, Aflið á Akureyri og Bjarmahlíð á Akureyri styrkt. Þar að auki veitir VIRK árlega jólastyrk til góðra verkefna og ákveðið var að þessu sinni að styrkja verkefnið Heimilisfriður, sem er meðferðar- og þekkingarmiðstöð um ofbeldi í nánum samböndum um eina milljón króna.
Styrkveitingarnar tengjast allar „Það má ekkert lengur“-vitundarvakningu VIRK sem hefur vakið mikla athygli og vakið fólk til umhugsunar um kynferðislega áreitni á vinnustöðum.
Styrkveitingarnar eru einnig liður í því að efla samstarfið milli VIRK og þeirra sem starfa að þessum mikilvæga málaflokki með það að markmiði að bæta heildarþjónustu við þjónustuþega VIRK og auka samvinnu og samstarf ólíkra aðila innan velferðarkerfisins.