Flutningum á öllum íhlutum fyrstu fjórtán vindmyllanna frá Þorlákshöfn að Vaðölduveri lauk í gær. Flutningarnir hófust aðfararnótt 7. maí og fóru að mestu fram að næturlagi eftir um 130 kílómetra leið.
Verkefnið var umfangsmikið enda þurfti að flytja fjölmarga stóra íhluti, þar á meðal tæplega 69 metra langa vindmylluspaða.
Í tilkynningu frá Landsvirkjun segir að verkefnið hafi gengið vel og byggði það á vönduðum undirbúningi og góðri samvinnu þýska vindmylluframleiðandans Enercon, ET þungaflutninga, norska flutningafyrirtækisins Bergen Spesial, lögreglu, Vegagerðarinnar, sveitarfélaga, Landsvirkjunar og fleiri aðila.
Næsta vor hefjast flutningar á íhlutum fjórtán vindmylla til viðbótar að Vaðölduveri. Fram að því heldur samsetning fyrstu vindmyllanna áfram á framkvæmdasvæðinu.