Flutningar á vindmyllum frá Þorlákshöfn í Vaðölduver hefjast seint í kvöld og verða viðamestu þungaflutningar sem fram hafa farið hérlendis. Landsvirkjun hefur unnið að ítarlegum undirbúningi með Vegagerðinni svo flytja megi vindmylluhlutana með öruggum hætti.
Meðal annars hefur verið unnið að breikkun á gatnamótum og vegum á leiðinni, auk þess sem Þjórsárbrú var álagsprófuð. Flutningarnir munu standa yfir næstu 7-9 vikur, sex nætur vikunnar en gert er hlé aðfaranótt sunnudags.
Reiknað er með að bílalestin leggi af stað um klukkan 22 frá höfninni í Þorlákshöfn en þaðan verður ekið austur að Eyrarbakka og upp Eyrarbakkaveg, inn á Votmúlaveg í Sandvíkurhreppi og Gaulverjabæjarveg í Flóahreppi og síðan inn á þjóðveg 1 austan við Selfoss. Leiðin liggur svo austur að Landvegamótum, þar sem beygt er upp Landveg og þaðan alla leið upp í Vaðöldu.
Flutningsleiðin er um 130 km og meðalhraði flutningslestarinnar er áætlaður um 30 km/klst. þannig að ferðin frá Þorlákshöfn í Vaðölduver tekur yfirleitt 4-6 klukkustundir.
Fjórtán vindmyllur verða fluttar á þessu ári og aðrar fjórtán á því næsta, samtals 28 vindmyllur. Áætlað er að Vaðölduver verði komið í fullan rekstur seinni hluta árs 2027.
Allar upplýsingar um flutningana má finna hér: Vaðölduver | Flutningar