Villtist við Heklu

Björgunarsveitir frá Hellu og Hvolsvelli leituðu í kvöld erlendrar ferðakonu er varð viðskila við ferðafélaga sína er þau gengu á Heklu.

Hún snéri við og hugðist ganga í bílinn en þegar ferðafélagar hennar komu niður af fjallinu var hún ekki þar.

Björgunarsveitir voru kallaðar út rétt fyrir kvöldmat og hófu strax að reyna staðsetja konuna, sem var í símasambandi.

Konan gat gefið vísbendinu um hvar hún var með því að miða ljósin á vindmyllum við Búrfell við ljós björgunarsveitabíla sem ekið var um svæðið. Reyndist hún stödd í hrauninu vestan við Heklu, ekki langt frá vegi.

Var hún í þokkalegu ástandi miðað við aðstæður enda ágætisveður á svæðinu.