Matvælastofnun fékk ábendingar um aðila sem gekk á milli hesthúsa á Eyrarbakka um síðustu helgi og kynnti sig sem starfsmann stofnunarinnar.
Í tilkynningu vill stofnunin árétta að engir eftirlitsmenn á hennar vegum voru að störfum á Eyrarbakka á þessum tíma. Viðkomandi var ekki á vegum stofnunarinnar og hefur engar heimildir til eftirlits.
„Atvik sem þessi eru því miður ekki einsdæmi og hefur það komið fyrir áður að óviðkomandi aðilar gefi sig út fyrir að framkvæma opinbert eftirlit. Af þessu tilefni vill Matvælastofnun beina því til umráðamanna dýra, sem og almennings alls, að sýna aðgát og vera á verði gagnvart háttalagi sem þessu,“ segir í tilkynningu Matvælastofnunar og þar er því bætt við að eftirlitsmenn stofnunarinnar klæðist alltaf merktum vinnufatnaði og bera skírteini sem þeim ber að framvísa til að sanna á sér deili.
Verði fólk vart við aðila sem gefa sig út fyrir að vera starfsmenn Matvælastofnunar án tilskilinna heimilda er það vinsamlegast beðið um að hafa tafarlaust samband við stofnunina og, eftir atvikum, tilkynna atvikið til lögreglu.