Fyrir skömmu fór heimasíðan MyFolio í loftið en síðan er hugsuð sem vettvangur fyrir skapandi fólk á Íslandi. Að baki síðunnar standa Selfyssingarnir Emelía Sól Gústavsdóttir, Ísak Eldjárn Tómasson og Dagur Snær Elísson.
Á MyFolio getur skapandi fólk skráð sig og um leið komið verkum sínum á framfæri. MyFolio er ætluð öllum þeim sem vinna við skapandi greinar, hvort það það er tónlistarmaður, rithöfundur, kvikmyndagerðarmaður, ljósmyndari, húðflúrari eða allt annað.
„Við opnuðum „mjúklega“ fyrir viku síðan til að byrja á að fá fólk til að prófa platformið og sjá hvort allt virki eins og það á að gera,“ segir Dagur þegar blaðamaður sunnlenska.is hitti þremenningana fyrir utan Konungskaffi á Selfossi í blíðskaparveðri.
Ísak skýtur inn í að heimasíðan sé í stöðugri vinnslu. „Við erum ennþá að fá viðbrögð frá fólki og erum með fullt af hugmyndum hverju við viljum bæta við.“
Hundrað manns á fimm dögum
Þrátt fyrir að það sé einungis vika síðan heimasíðan fór í loftið þá hefur hún heldur betur sprungið út. „Viðtökurnar hafa verið fáránlega góðar. Ég held að við séum að nálgast 100 manns, sem komu inn bara á fyrstu fimm dögunum,“ segir Ísak og Dagur bætir við að daglega bætist í MyFolio hópinn og flokkarnir verða sömuleiðis stöðugt fjölbreyttari.
„Stærsti flokkurinn núna er áhrifavalda-flokkurinn. Það er starfsgrein sem er að stækka svolítið hratt í dag. Við erum bara búin að auglýsa á TikTok og það stendur því næst að flestir komi inn þaðan,“ segir Dagur.
Selfyssingar sem smullu saman
Þremenningarnir segja að samstarfið gangi mjög vel en þess má geta að Emelía og Ísak eru par og hafa unnið mikið saman. „Við erum Selfyssingar og ég hef alltaf vitað hver Dagur er en ekki þekkt hann neitt þannig. Svo hittumst við á einhverjum viðburði um daginn og þá fórum við eitthvað að spjalla. Svo tókum við kaffi eftir það, “ segir Ísak. „Við bara smullum saman,“ segir Dagur.
Dagur hefur þó nokkra reynslu af fyrirtækjarekstri en MyFolio er fimmta fyrirtækið sem hann stofnar. „Ég sé um viðskiptapartinn, bókhald og annað fjármálatengt. Emelía og Ísak sjá meira um skapandi partinn. Emelía var náttúrulega með hugmyndina og hugmyndin er kannski ekkert ósvipuð fyrsta fyrirtækinu sem ég stofnaði fyrir nokkrum árum sem hét Mín hönnun. Þá vorum við meira að koma listamönnum og hönnuðum á framfæri en með MyFolio ertu kominn með miklu víðara konsept,“ segir Dagur sem starfar sem atvinnuflugmaður og er í frumkvöðlastarfsemi þar á milli.
Þægilegt að hafa allt á einum stað
Hugmyndin að MyFolio kviknaði fyrst fyrir fjórum árum. „Ég var að útskrifast sem ljósmyndari úr Tækniskólanum 2022. Ég var þá búin að stofna Instagram-síðu og búin að setja inn einhver skólaverkefni á síðuna. Í gegnum Instagram kom svo eitt og eitt verkefni. Mér fannst samt alltaf ótrúlega erfitt að vera fiska einhver verkefni og hvar ég ætti að sækja verkefnin,“ segir Emelía.
„Það var mjög tilviljanakennt að hugmyndin fór aftur á flug. Það er kannski mánuður síðan að ég fór allt í einu að hugsa aftur um þetta. Mér fannst vanta einn stað fyrir allt þetta hæfileikaríka fólk sem þarf að koma sér á framfæri. Þetta er líka ótrúlega þægilegt fyrir þann sem er til dæmis að leita sér að ljósmyndara, að hann getur séð allt á einum stað og valið þannig út frá hvað myndi henta best.“
Eru rétt að byrja
Dagur segir að þau séu öll á þeirri þeirri vegferð að þeim langi að lyfta öðrum upp og hjálpa fólki að ná lengra. „Allavega er það sterkt á mínum samfélagsmiðlum, af því að ég hef gert svo mikið. Ég hef verið ófeiminn við að elta draumana mína, fara í flugnám, stofna nokkur fyrirtæki, ferðast og fleira. Og sama hjá Emelíu og Ísak. Þannig að við erum svolítið á þeirri vegferð að viljum hjálpa fólki að elta draumana sína,“ segir Dagur.
Ísak tekur undir orð Dags. „Við viljum líka að búa til sem mest verðmæti fyrir skaparann.“
Dagur segir að þetta sé í raun bara byrjunin hjá þeim. „Við ætlum okkur alveg stærri hluti, við erum með allskonar pælingar í hausnum sem mun hjálpa skapandi fólki að ná lengra. Maður hefur alveg fundið það er ofboðslega erfitt að ætla að taka fyrstu skrefin og hafa kannski engin tengsl. Þannig að við erum með svona hugmyndir til að efla tengslamyndun og hjálpa fólki að taka fyrstu skrefin.“
„Við hvetjum alla sem eru í skapandi greinum að hafa samband og ef flokkurinn er ekki inn á síðunni þá er alveg hægt að senda á okkur, mögulega getum við bætt honum við,“ segir Dagur ennfremur.