Til greina kemur að ráðist verði í fornleifarannsóknir í Skálholti næsta sumar í kjölfar viðbragða við kenningu um að svokallaðir Lewis taflmenn hafi verið skornir út þar undir lok 12. aldar eða í upphafi þeirrar 13.
Eins og sagt hefur verið frá í fréttum hefur Guðmundur G. Þórarinsson, verkfræðingur og fyrrum varaþingmaður, kynnt niðurstöður rannsókna sinna á uppruna forngripa sem fundust á Lewis eyju vestur af Skotlandi fyrir um 180 árum. Hefur Guðmundur sett fram þá kenningu að gripirnir, sem þykja einhverjir þeir merkustu í safni breska þjóðminjasafnsins, hafi verið skornir út úr rostungstönnum, hugsanlega af Margréti Högu undir umsjón Páls Jónssonar sem var biskup í Skálholti 1195 til 1211.
Til þessa hefur verið talið að þeir hafi verið frá Þrándheimi í Noregi, útfrá því að álíka gripir hafa fundist þar.
Guðmundur sagði í samtali við Sunnlenska að þrátt fyrir að ýmsir hafi haft uppi efasemdir um kenningu sína væru fleiri að komast á sömu skoðun og hann og hafa ráðamenn erlendra safna sýnt málinu áhuga. Sömuleiðis sé áhugi á því að hefja uppgröft í Skálholti til að leita að samskonar munum sem tengja má við taflmennina, hvort sem um er að ræða samskonar muni eða með DNA-rannsóknum.
Telur Guðmundur það vel mögulegt að leifar rostungstanna sé að finna á því svæði sem smiðja Páls biskups stóð eða í haugi þar í grennd.