Vilja ekki hótelbyggingu við Heimaland

Byggðarráð Rangárþings eystra hvetur eigendur Víghóls ehf. til þess að velja annan stað í sveitarfélaginu til byggingar hótels, heldur en á íþróttavellinum við félagsheimilið Heimaland.

Á fundi byggðarráðs í morgun var tekið fyrir erindi vegna hugsanlegrar hótelbyggingar Víghóls ehf á þjónustulóð við Heimaland.

Fyrr í febrúar var haldinn kynningarfundur að Heimalandi til að kynna hugmyndina fyrir íbúum. Í kjölfarið barst sveitarstjórn undirskriftarlisti þar sem fjölmargir íbúar Vestur-Eyjafjalla lýstu yfir að þeir væru mótfallnir því að byggja hótel á íþróttavellinum við félagsheimilið Heimaland.

Byggðaráð bókaði á fundi sínum í morgun hvatningu til Víghóls að velja annan stað til hótelbyggingarinnar og var sveitarstjóra falið að svara óformlegu kauptilboði Víghóls.