Sveitarstjórn Mýrdalshrepps fagnar þeirri ákvörðun innanríkisráðherra að höfuðstöðvar lögreglustjóraembættisins á Suðurlandi verði á Hvolsvelli.
„Hvolsvöllur er miðsvæðis á Suðurlandi og því er byggðalagið vel í sveit sett,“ segir í bókun sveitarstjórnar, sem mælir einnig eindregið með því að Kjartan Þorkelsson, sýslumaður í Rangárvallasýslu, verði lögreglustjóri í þessu nýja umdæmi.
„Ástæðan er m.a. sú að Kjartan Þorkelsson og starfsmenn embættis hans hafa byggt upp öflugar Almannavarnir í samvinnu við viðbragðsaðila og íbúa þessara sveitarfélaga. Reyndi verulega á skipulagningu þessara mála í þeim stóru áföllum sem hér urðu á síðustu árum í eldgosunum í Eyjafjallajökli 2010 og Grímsvötnum 2011 svo og við stórflóð í Múlakvísl 2012 sem sýndi svo ekki verður um villst mikilvægi þess að hafa öflugt fólk með víðtæka reynslu á þessu sviði við stjórnvölin þegar á reynir. Þá hefur Kjartan og hans fólk verið ötult við að byggja upp og styrkja sameinað lögregluembætti Rangárvalla- og Vestur-Skaftafellssýslu,“ segir ennfremur í bókun hreppsnefndar.