Nærri 200 björgunarmenn leituðu án árangurs að ferðamanni í nágrenni Háafoss í Þjórsárdal í gærkvöldi. Leitað var fram í myrkur en leit hófst aftur í morgun og er fjöldi björgunarsveitarfólks á leið á vettvang.
Samkvæmt upplýsingum frá lögreglunni á Suðurlandi hafði maðurinn ekki skilað sér á gististað og fékk lögreglan tilkynningu um það eftir hádegi í gær.
Í gærkvöldi var þyrla Landhelgisgæslunnar nýtt við leitina ásamt fjölda dróna og gönguhópa. Í tilkynningu frá Landsbjörgu segir að aðstæður séu um margt erfiðar á svæðinu, krapi og drulla þar sem frost er að fara úr jörðu og svæðið erfitt yfirferðar.
