Nú er búið er að reisa allt stálvirki viðbyggingarinnar við íþróttahúsið í Hveragerði og langt komið með að setja yleiningar á útveggi en að því loknu verður hafist handa við að loka þakinu.
Að sögn Guðmundar F. Baldursson, byggingarstjóra, er stefnt að því að viðbyggingin verði að mestu leyti fokheld í lok mánaðarsins en þá verður þó eftir að einangra og steypa gólfplötu íþróttasalarins. Þessi hluti verksins er á áætlun og gert er ráð fyrir verklokum í mars næstkomandi.
Í framhaldi af því verður hafist handa við að klæða húsið að utan, innrétta það og ganga frá lóð. Að sögn Guðmundar er gerð útboðsgagna fyrir þá verkhluta vel á veg komin.

