Viðbragðsaðilar á Suðurlandi auk Landhelgisgæslu Íslands og slökkviliðs Grindavíkur verða með töluverðan viðbúnað í nágrenni Selfossflugvallar eftir hádegi í dag en þar verður unnið að gerð kennsluefnis.
Tvær þyrlur Landhelgisgæslunnar verða á svæðinu auk lögreglu, slökkviliðs og björgunarsveita.
Lögreglan á Suðurlandi mælist til þess að fólk fljúgi ekki drónum í um tveggja og hálfs kílómetra radíus frá Selfossflugvelli milli 12:00 til 18:00 í dag.
Vegfarendur sem eiga leið framhjá svæðinu þurfa því ekki að láta sér bregða þrátt fyrir að töluverður viðbúnaður verði á svæðinu. Verkefninu er ætlað að stuðla að enn betri samhæfingu íslenskra viðbragðsaðila.