112 dagurinn er haldinn hátíðlegur í dag víða um land. Á Suðurlandi munu viðbragðsaðilar aka um á bláum ljósum í tilefni dagsins.
Klukkan 11:20 verður bláljósaakstur á flestum þéttbýlisstöðum á Suðurlandi, sem og í Uppsveitunum. Þar munu slökkvilið, sjúkraflutningar HSU, björgunarsveitir á hverjum stað og lögreglan á Suðurlandi taka þátt.
Í Skaftárhreppi koma viðbragðsaðilar saman við grunnskólann á Kirkjubæjarklaustri kl. 12:50 og á Höfn í Hornafirði verður opið hús hjá Slökkviliði Hornafjarðar frá kl. 10:00 til 12:00. Í hádeginu munu slökkvilið, sjúkraflutningar HSU, lögreglan á Suðurlandi og Björgunarfélag Hornafjarðar fara í bláljósaakstur um sveitarfélagið.
Markmið 112 dagsins er að minna á þetta mikilvæga neyðarnúmer ásamt því að þakka neyðarvörðum og öðrum viðbragðsaðilum fyrir þeirra ómetanlegu störf. Dagsetningin 11.2. er táknræn og hjálpar landsmönnum að muna þetta lífsnauðsynlega númer.
Til þess að samstarf innhringjanda og neyðarvarðar gangi sem farsællegast er gagnlegt að vera viðbúinn að svara eftirfarandi spurningum þegar hringt er í 1-1-2.
· Hvar er atburðurinn?
· Hver ert þú?
· Hvað gerðist?
· Hvenær gerðist atburðurinn?
