Slökkviliðsmenn frá Brunavörnum Árnessýslu á Selfossi voru kallaðir á vettvang við Strokkhól í Sandvíkurhreppi á tólfta tímanum í morgun þar sem eldur hafði kviknað í sinu.
Neisti frá suðuvinnu hljóp í sinuna og breiddist eldurinn hratt út. Að sögn Halldórs Ásgeirssonar, varðstjóra hjá Brunavörnum Árnessýslu, gekk ótrúlega vel að slökkva en um 180 metra belti meðfram Eyrarbakkavegi brann.
„Suðumennirnir voru vel undirbúnir, með slökkvitæki og mottur til taks en við þessar aðstæður þá breiðist þetta hratt út,“ segir Halldór og hvetur fólk til að fara varlega með allan eld úti í náttúrunni þessa dagana, þar sem gróðurinn er mjög þurr. „Við bíðum spenntir eftir rigningunni,“ bætti hann við.
Dagvaktin hjá Brunavörnum Árnessýslu á Selfossi mætti á vettvang og þurfti ekki að kalla út auka mannskap. Eins og sunnlenska.is hefur greint frá er þarna verið að vinna að lagningu nýrrar heitavatnslagnar niður á strönd, Eyrarlagnar.
Eftir að fréttir af sinueldinum bárust í morgun voru margir lesendur sunnlenska.is uggandi um álfana í Strokkhól. Álfabyggðin slapp við eldinn enda hefur eftirlitsmaður Eyrarlagnar samið við þá um framkvæmdir í kringum hólinn.
