Veðurstofan varar við slæmu veðri í öllum landshlutum á aðfangadag. Lægð kemur upp að landinu í nótt, hún dýpkar hratt og veldur sunnan hvassviðri og rigningu.
Lægð er spáð upp að landinu í nótt. Hún dýpkar hratt og veldur sunnan hvassviðri og rigningu sunnantil snemma morguns en slyddu eða snjókomu til fjalla.
Lægðin gengur norðaustur yfir land og síðdegis er spáð norðvestan stormi með snjókomu á austurhluta landsins. Vindhraði gæti þar farið upp í 23-28 m/s og hviður yfir 40 m/s um og eftir kl. 18.
Landsmönnum er bent á að athuga vel bæði færð, veður og veðurspá áður en þeir leggja í ferðalög á milli landshluta því færð spillist mjög fljótt í veðri sem þessu.
Ljóst er að veður verður slæmt í öllum landshlutum á mismunandi tíma á morgun, og nauðsynlegt að gæta varúðar.
Nýjustu upplýsingar um veður og færð er að finna á heimasíðum Veðurstofunnar (www.vedur.is) og Vegagerðarinnar (www.vegagerdin.is)