Viðvaranir vegna slæms veðurs og vatnavaxta

sunnlenska.is/Sigurður Jónsson

Veðurstofa Íslands vill vekja athygli á að spáð er mjög slæmu veðri um allt land á morgun, laugardaginn 12. mars. Í kvöld og nótt nálgast mjög kröpp og djúp lægð landið sunnan úr hafi.

Lægðinni fylgir suðaustanhvassviðri eða -stormur með talsverðri slyddu eða rigningu í nótt og fyrramálið, einkum suðaustanlands. Síðan snýst í suðvestanstorm eða -rok með éljagangi, jafnvel ofsaveðri norðvestan til.

Vegfarendur eru beðnir að fylgjast vel með veðurspám og ástandi vega á morgun.

Veðurstofan varar einnig við miklum vatnavöxtum í ám, meðal annars á Hvítársvæðinu suður af Langjökli, í kringum Eyjafjalla- og Mýrdalsjökul og við sunnanverðan Vatnajökul. Á sunnudag um hádegisbil er spáð mikilli rigningu á sunnan og vestanverðu landinu samhliða hlýnandi veðri. Því má búast við asahláku á þessum svæðum. Þetta verður fyrsta asahláka ársins og má því búast við miklu vatns rennsli vegna úrkomu og leysingarvatns.

Vegna þessara viðvarana Veðurstofunnar hvetur almannavarnadeild ríkislögreglustjóra vegfarendur til þess að fylgjast vel með veðurspám á vef Veðurstofunnar og ástandi vega og færð á vefsíðu Vegagerðarinnar sérstaklega ef lagt er í langferð.

Þar sem búist er við mikilli hláku er brýnt að hreinsa frá niðurföllum og sýna aðgát við akstur.