„Við eigum að fæðast, veikjast og deyja í Reykjavík“

Rúmlega 250 manns mættu á íbúafund sem Sveitarfélagið Árborg boðaði til vegna fyrirhugaðs niðurskurðar á fjárlögum til HSu.

Fjölmargir stigu á stokk og lýstu skoðun sinni á því ástandi sem vofir yfir á Suðurlandi. Óskar Reykdalsson, lækningaforstjóri á HSu, fór yfir staðreyndir málsins og hjá honum kom m.a. fram að til þessar tillögur gætu gengið upp þyrfti HSu að taka við minna veikum sjúklingum og sinna þeim minna. Fæðingarþjónusta myndi flytjast til Reykjavíkur en á meðgöngunni nálgast hver móðir þjónustu á HSu tuttugu sinnum. Sú yfirfærsla til Reykjavíkur myndi þýða 26.000 ferðir mæðra yfir Hellisheiðina.

Elva Dögg Þórðardóttir, formaður Samtaka sunnlenskra sveitarfélaga, var ómyrk í máli og hvatti hún ráðamenn til að taka málið til alvarlegrar endurskoðunar. „Ef þetta verður að veruleika er bara eitt í spilunum fyrir Sunnlendinga. Við eigum að fæðast, veikjast og deyja í Reykjavík,“ sagði Elva Dögg.

Boðað hefur verið til samstöðufundar á Selfossi kl. 17 á mánudag. Sveitarstjórnarmenn munu þá funda með ráðherra á veitingastaðnum Riverside og eru Sunnlendingar hvattir til að fjölmenna fyrir utan fundarstaðinn.

Nánar verðir fjallað um íbúafundinn á sunnlenska.is síðar í dag.